ໃນ​ລະຫວ່າງ ວັນ​ທີ 20-21 ມັງກອນ 2011 ຫ້ອງການ ອົງການ ​ຊັບພະຍາກອນ​ນ້ຳ ​ແລະ ສິ່ງ​ແວດ​ລ້ອມ ​ໄດ້​ຈັດກອງ​ປະຊຸມ ສຳມະນາ ກ່ຽວກັບ ການ​ກະກຽມ​ສ້າງ​ແຜນ​ງົບປະມານ ສົກ​ປີ 2011-2012 ​ໃຫ້​ແກ່​ພະນັກງານ​ວິຊາ​ການ ຂອງ ອຊນສ ຈັດ​ຂື້ນ​ທີ ​ນາປາກວາງລີສອດ ແຂວງ ວຽງຈັນ, ​ໂດຍ​ການ​ເປັນ​ເຈົ້າ​ການ​ຂອງ ພະ​ແນ​ກ ການ​ເງິນ, ຫ້ອງການ ອຊນສ. ສຳລັບ ການຝຶກອົບຮົມຄັ້ງນີ້ ໄດ້ມີນັກສຳມະນາກອນ ຈາກກົມ, ກອງຕ່າງໆ ອ້ອມຂ້າງ ອຊນສ ຈຳນວນ 34 ທ່ານ ແລະ ວິທະຍາກອນ ຈາກຫ້ອງການ ອົງການ ຊັບພະຍາກອນນໍ້າ ແລະ ສິ່ງແວດລ້ອມ 02 ທ່ານ

ຈຸດປະສົງ​ຂອງກອງ​ປະຊຸ​ມ ສຳ​ມະ​ນາ ​ໃນ​ຄັ້ງ​ນີ້​ແມ່ນ ​ເພື່ອ​ເຮັດ​ໃຫ້​ພະນັກງານ​ວິຊາ​ການ​ຜູ້​ຮັບຜິດຊອບ​ວຽກ​ງານ​ແຜນການ, ວຽກ​ງານ​ຄຸ້ມ​ຄອງ​ການ​ເງິນ​ຂອງ​ແຕ່​ລະ​ກົມ, ກອງ, ສະ​ຖາ​ບັນ ພາຍ​ໃນ ອຊນສ ​ເຂົ້າ​ໃຈ​ກ່ຽວ​ກັບ​ວິທີ​ການ​ສ້າງ​ແຜນ​ງົບປະມານ ສົກ​ປີ 2011-2012 ຂອງ​ກົມ ກອງ ​ໃຫ້​ຖືກ​ຕ້ອງຕາ​ມຄຳ​ແນະນຳ​ຂອງ​ລັດຖະມົນຕີວ່າການ ​ກະຊວງການ​ເງິນວ່າ​ດ້ວຍ​ການຈັດ​ຕັ້ງ​ປະຕິບັດ​ແຜນ​ງົບປະມານ ສົກ​ປີ 2010-2011 ​ເພື່ອ​ຮັບປະກັນ​ໃຫ້​ແກ່​ການ​ສ້າງ​ແຜນ​ງົບປະມານ​ໃຫ້​ຖື​ກຕ້ອງຕາ​ມລະບຽບ​ຫຼັກການ ​ແລະ ກຳນົດ​ເວລາ​ທີ່​ກຳນົດ​ໄວ້.