|
There are no translations available.
ທັດສະນະສຶກສາຄັ້ງທີ 40 ຢູ່ ສປ ຈີນ ແລະ ການມອບເຄື່ອງຮັບດາວທຽມຂອງ ສປ ຈີນ ໃຫ້ແກ່ກົມອຸຕຸນິຍົມ ແລະ ອຸທົກກະສາດ ສປປ ລາວ.
ໃນຕອນເຊົ້າວັນຈັນ ວັນທີ 11/04/2011. ອົງການອຸຕຸນິຍົມແຫ່ງ ສາທາລະນະລັດ ປະຊາຊົນຈີນ (ສປ ຈີນ) ທີ່ນະຄອນຫຼວງປັກກິ່ງໄດ້ເປີດການທັດສະນະສຶກສາຕາມແຂວງຕ່າງໆຂອງ ສປ ຈີນ ຂອງຜູ້ຕາງໜ້າລະດັບສູງຈາກກົມອຸຕຸນິຍົມ ແລະ ອຸທົກກະສາດ ຈາກບັນດາປະເທດກຳລັງພັດທະນາໃນຂົງເຂດອາຊີອາຂະເນ ໃນນີ້ຕາງໜ້າຈາກກົມ ອຸຕຸນິຍົມ ແລະ ອຸທົກກະສາດ ສປປ ລາວ. ໂດຍ ທ່ານສິງທອງ ປະທຸມມະດີ, ຮອງ ຫົວໜ້າກົມ ອຸຕຸນິຍົມ ແລະ ອຸທົກກະສາດ ເຂົ້າຮ່ວມ.
ໃຫ້ກຽດເປັນປະທານ ເປີດພິທີດັ່ງກ່າວໂດຍທ່ານ Dr. Zheng Guoguang, ຫົວໜ້າອົງການອຸຕຸນິຍົມ ສປ ຈີນ, ຕາງໜ້າຈາກອົງການອຸຕຸນິຍົມໂລກ. ທ່ານ Dr. Zheng Guoguang ໄດ້ກ່າວເນັ້ນໜັກຕໍ່ກອງປະຊຸມວ່າ ສປ ຈີນ ແມ່ນຜູ້ສະນັບສະໜູນຫຼັກສຳລັບການຮ່ວມມືກັບອົງການອຸຕຸນິຍົມໂລກເຊິ່ງມີຈຸດປະສົງໃນການສ້າງຄວາມເຂັ້ມແຂງທາງດ້ານຊັບພະຍາກອນມະນຸດດ້ານອຸຕຸນິຍົມໃນບັນດາປະເທດທີ່ກຳລັງພັດທະນາ ແລະ ປະເທດດ້ອຍພັດທະນາ.
ສປ ຈີນ ແລະ ອົງການອຸຕຸນິຍົມໂລກ ໄດ້ຮ່ວມກັນຈັດການທັດສະນະສຶກສາໃນຂອບເຂດ ສປ ຈີນ ແຕ່ປີ 1978 ເປັນຕົ້ນມາ ແລະ ຄັ້ງນີ້ແມ່ນຄັ້ງທີ່ 40, ເຊິ່ງໄດ້ເຊື້ອເຊີນເອົາພະນັກງານອາວຸໂສຈາກກົມອຸຕຸນິຍົມໃນປະເທດຕ່າງໆເພື່ອເຂົ້າຮ່ວມ.
ຫຼັງຈາກນັ້ນອົງການອຸຕຸນິຍົມຂອງ ສປ ຈີນ ກໍ່ໄດ້ມອບເຄື່ອງຮັບດາວທຽມແບບຄົບຊຸດໃຫ້ແກ່ບັນດາປະເທດຕ່າງໆ. ໃຫ້ກຽດຂື້ນຮັບເຄື່ອງດັ່ງກ່າວໂດຍ ທ່ານ ສິງທອງ ປະທຸມມະດີ, ຮອງຫົວໜ້າ ກົມອຸຕຸນິຍົມ ແລະ ອຸທົກກະສາດ.
ເຄື່ອງອຸປະກອນດັ່ງກ່າວປະກອບມີ: ເຄື່ອງຮັບດາວທຽມ 1 ໜ່ວຍ, Switch hup 1 ໜ່ວຍ, ຄອມຜິວເຕີສຳລັບໃຊ້ CMAcast 1 ໜ່ວຍ, ຄອມຜິວເຕີໃຊ້ລະບົບ MICAPS 1 ໜ່ວຍ ແລະ ຄອມຜິວເຕີໃຊ້ລະບົບ shinetec GEOSS 1 ໜ່ວຍ.
ສຳລັບອຸປະກອນນີ້ແມ່ນຈະໄດ້ນຳໄຊ້ເຂົ້າໃນວຽກງານວິໃຈຮູບພາບດາວທຽມ, ແຜ່ນທີ່ອາກາດ, ພະຍາກອນອາກາດ ແລະ ອື່ນໆເພື່ອເຮັດໃຫ້ວຽກພະຍາກອນອາກາດຢູ່ ສປປ ລາວ ນັບມື້ນັບດີຂື້ນໄປເທື່ອລະກ້າວ. |
