ອົງການ ຊັບພະຍາກອນ​ນ້ຳ ​ແລະ ສິ່ງ​ແວດ​ລ້ອມ ຈັດຕັ້ງການເຜີຍແຜ່ເຊື່ອມຊຶມ ເອກະສານ ຜົນສຳເລັດຂອງກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ IX ຂອງພັກ ປະຊາຊົນ ​ປະຕິວັດ ​ລາວ. ເຊິ່ງພິທີດັ່ງກ່າວໄດ້ຈັດຂຶ້ນໃນວັນທີ 20 ພຶດສະພາ 2011 ທີ່ສະໂມສອນ ກົມ​ອຸຕຸນິຍົມ ​ແລະ ອຸ​ທົກ​ກະສາ​ດ. ໂດຍການເປັນປະທານຂອງ ທ່ານ ນ. ​ເຂັມ​ແພງ ພົນ​ເສນາ ລັດຖະມົນຕີ ປະຈຳ​ສຳນັກງານ​ນາຍົກລັດຖະມົນຕີ, ເລຂາຄະນະພັກຮາກ​ຖານ, ຫົວໜ້າ ອົງການ ຊັບພະຍາກອນ​ນ້ຳ ​ແລະ ສິ່ງ​ແວດ​ລ້ອມ, ມີຜູ້ເຂົ້າຮ່ວມຮັບຟັງ ຊຶ່ງແມ່ນ​ເລຂາ, ຄະນະໜ່ວຍ​ພັກ, ສະມາຊິກ​ພັກ, ຫົວໜ້າ, ຄະນະ​ຫ້ອງການ, ກົມ, ກອງ, ສະ​ຖາ​ບັນ, ​ເລຂາ, ປະທານ ສາມ​ອົງການ​ຈັດ​ຕັ້ງ​ມະຫາຊົນ ​ແລະ ພະນັກງານຫລັກແຫລ່ງພາຍ​ໃນ ອຊນສ ຢ່າງ​ພ້ອມພຽງ​.

ທ່ານ ນ. ​ເຂັມ​ແພງ ພົນ​ເສນາ ໄດ້ໃຫ້ກຽດຂຶ້ນເຜີຍແຜ່ເອກະສານຜົນສຳ​​ເລັດ​ຂອງ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ ຄັ້ງ​ທີ IX ຂອງ​ພັກ​ປະຊາຊົນ​ປະຕິວັດ​ລາວ ທີ່ມີເນື້ອໃນສຳຄັນວ່າ: ກອງປະຊຸມໃຫຍ່ເລັ່ງໃຫ້ນຳເອົາຫນ້າທີ່ລວມແຫ່ງການບຸກທະລຸທັງ 4 ດ້ານນັ້ນເຂົ້າສູ່ພາກປະຕິບັດໂດຍໄວ, ກອງປະຊຸມຍັງໄດ້ເປັນເອກະສັນຮັບຮອງເອົາບັນດາຫນ້າທີ່ ແລະ ທິດທາງວຽກງານຈຸດສຸມໃນ 5 ປີຕໍ່ຫນ້າ (2011-2015) ເຊັ່ນທາງດ້ານ ເສດຖະກິດແມ່ນຢຶດຫມັ້ນ ແລະ ສືບຕໍ່ປະຕິບັດວຽກງານຈຸດສຸມຕົ້ນຕໍຖືເອົາການພັດທະນາເສດຖະກິດເປັນໃຈກາງ ພັດທະນາຂົງເຂດວັດທະນະທຳ- ສັງຄົມ ໃຫ້ສົມຄູ່ກັບເສດຖະກິດ, ຮັບປະກັນຄວາມກົມກຽວ ແລະ ຄວາມຍືນຍົງໂດຍຢຶດຫມັ້ນການພັດທະນາ ລະບົບການສຶກສາແຫ່ງຊາດ ຫລື ການສ້າງຄົນເປັນໃຈກາງ, ເສີມຂະຫຍາຍບົດບາດຂອງລະບົບອົງການອຳນາດແຫ່ງລັດໃຫ້ສູງຂຶ້ນ. ເພີ່ມທະວີ ວຽກງານແນວໂຮມຂອງພັກ, ປະຕິບັດ ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານໃຫ້ເລິກເຊິ່ງກວ້າງຂວາງ ເປີດກວ້າງ ການພົວພັນກັບຕ່າງປະເທດ ແລະ ຮ່ວມມື ສາກົນ ໂດຍຢຶດຫມັ້ນ ແນວທາງການຕ່າງປະເທດສັນຕິພາບ ເອກະລາດ ມິດຕະພາບ ແລະ ການຮ່ວມມືຢ່າງສະເຫມີຕົ້ນສະເຫມີປາຍ ແລະ ປັບປຸງກໍ່ສ້າງພັກ ໃຫ້ມີຄວາມປອດໃສຫນັກແຫນ້ນ ແລະ ເຂັ້ມແຂງ ມີ​ຄວາມ​ສາມາດ​ນຳພາ​ຢ່າງ​ສົມ​ຄູ່​ກັບ​ພາລະກິດ​ປົກ​ປັກ​ຮັກສາ ​ແລະ ສ້າງສາ​ພັດທະນາ​ປະ​ເທດ​ຊາດ ​ໃນ​ເງື່ອນ​ໄຂ​ໃຫມ່ ​ໂດຍ​ຍຶດຫມັ້ນ​ໃນ​ທິດ​ທາງ​ລວມກ່ຽວ​ກັບ​ການ​ສ້າງ​ພັກ.