|
ສພຊ-ອຊນສ ຈັດກິດຈະກຳສະຫຼອງວັນສິ່ງແວດລ້ອມໂລກ |
 |
 |
 |
|
ຂຽນໂດຍ Som Oula YAPHICHIT
|
|
ວັນຈັນທີ່ 06 ມິຖຸນາ 2011 ເວລາ 08: 04 |
(ວຽງຈັນໃຫມ່) ສະພາແຫ່ງຊາດ (ສພຊ) ອົງການ ຊັບພະຍາກອນນ້ຳ ແລະ ສິ່ງແວດລ້ອມ (ອຊນສ) ຈັດພິທີປູກຕົ້ນໄມ້ ແລະ ຍ່າງເພື່ອສຸຂະພາບ ສ້າງຂະບວນການສະເຫຼີມສະຫຼອງວັນສິ່ງແວດລ້ອມໂລກ 5 ມິຖຸນາ 2011 ພາຍໃຕ້ຫົວຂໍ້ "ປ່າໄມ້ ແມ່ນຊັບພະຍາກອນທຳມະຊາດທີ່ຕອບສະໜອງທຸກຢ່າງໃຫ້ພວກເຮົາ" ໃນຕອນເຊົ້າຂອງວັນທີ 4 ມິຖຸນາ 2011 ຜ່ານມາ ທີ່ບໍລິເວນເດີ່ນພຣະທາດຫຼວງ.
ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ກ່າວໃນພິທີຄັ້ງນີ້ວ່າ: ປ່າໄມ້ແມ່ນແຫຼ່ງຊັບພະຍາກອນທີ່ຕອບສະໜອງ 4 ປັດໄຈພື້ນຖານໃນການດຳລົງຊີວິດປະຈຳວັນຂອງປະຊາຊົນ ເປັນຕົ້ນ ໃຊ້ເປັນອາຫານຢາປົວພະຍາດທີ່ຢູ່ອາໄສ ແລະ ເຄື່ອງນຸ່ງຮົ່ມ ມີບົດບາດສຳຄັນໃນການຮັກສາລະບົບນິເວດວິທະຍາ ເຊັ່ນ: ການຜະລິດອົກຊີແຊນ ດູດທາດອາຍກາໂບນິກ ເຮັດໃຫ້ຝົນຕົກຖືກຕາມລະດູ ຊ່ວຍບໍ່ໃຫ້ໂລກຮ້ອນ ແລະ ຍັງມີບົດບາດສຳຄັນໃນການປ້ອງກັນໄພພິບັດທຳມະຊາດຕ່າງໆ ເຊັ່ນ: ໄພແຫ້ງ ແລ້ງ ນ້ຳຖ້ວມ ຕ້ານການກາຍເປັນທະເລຊາຍ ການເຊາະເຈື່ອນຂອງດິນ ແລະ ອື່ນໆ.
ປັດຈຸບັນ ປ່າໄມ້ແມ່ນນັບມື້ຖືກເຊື່ອມຖອຍລົງ ອັນໄດ້ສ້າງຜົນກະທົບໂດຍກົງ ຫຼື ທາງອ້ອມຕໍ່ສິ່ງແວດລ້ອມ ການດຳລົງຊີວິດຂອງສິ່ງທີ່ມີຊີວິດ ລວມໄປເຖິງມະນຸດເຮົາ ຊຶ່ງ ສປປ ລາວ ເນື້ອທີ່ປ່າໄມ້ຢູ່ທົ່ວປະເທດຫຼຸດໜ້ອຍຖອຍລົງ ເຮັດໃຫ້ການເກັບກັກອາຍກາໂບນິກ ກໍຫຼຸດໜ້ອຍລົງເຊັ່ນດຽວກັນ ສາມາດເຮັດໃຫ້ໂລກຮ້ອນ ແລະ ຮ້ອນຂຶ້ນທຸກວັນ.
ດັ່ງນັ້ນ ກິດຈະກຳໃນມື້ນີ້ແມ່ນເພື່ອເປັນການປູກຈິດສຳນຶກປຸກ ລະດົມໃຫ້ທົ່ວປວງຊົນລາວທັງຊາດໃຫ້ຮູ້ຈັກອະນຸຮັກ-ຮັກສາ ແລະ ເປັນມິດກັບສິ່ງແວດລ້ອມ ພ້ອມກັນຮ່ວມຂະບວນການສ້າງປະເທດລາວໃຫ້ເປັນສີຂຽວ ສະອາດ ແລະ ສວຍງາມ ເພື່ອຮ່ວມກັບປະຊາຄົມໂລກ ໃນການຕໍ່ສູ້ແກ້ໄຂພາວະໂລກຮ້ອນ ແລະ ການປ່ຽນແປງຂອງດິນຟ້າອາກາດໃຫ້ນັບມື້ຫຼຸດລົງ.
ເຂົ້າຮ່ວມກິດຈະກຳຄັ້ງນີ້ມີທ່ານ ສະໝານ ວິຍະເກດ ຫົວໜ້າຄະນະຊີ້ນຳວຽກງານແນວຄິດທິດສະດີ-ສັງຄົມ ຂັ້ນສູນກາງ ທ່ານ ສຸກັນ ມະຫາລາດ ເຈົ້າຄອງນະຄອນຫຼວງວຽງຈັນ ມີບັນດາລັດຖະມົນຕີວ່າການຊ່ວຍວ່າການ ຕາງໜ້າອົງການຈັດຕັ້ງ ແລະ ມວນຊົນ.
|
|
LAST_UPDATED2 |
