ອົງການ ຊັບ​ພະຍາກອນ​ນ້ຳ ​ແລ​ະ ສິ່ງ​ແວດ​ລ້ອມ (ອຊນສ) ຮ່ວມ​ກັບ ອົງການ ສຳ​ຫຼວດອາ​ວະ​ກາດ​ແຫ່ງ​ຊາດ ປະ​ເທດ​ຍີ່ປຸ່ນ ຈັດ​ກອງ​ປະ​ຊຸມນຳ​ໃຊ້ ​ເຕັກ​ໂນ​ໂລ​ຊີ​ອາ​ວະ​ກາດ ​ເພື່ອ​ສິ່ງ​ແວດ​ລ້ອມ ຄັ້ງ​ທີ 3 ຂອງ ອົງການ ອາ​ວະ​ກາດ​ພາກ​ພື້ນ​ອາຊີ-ປາຊີ​ຟິກ ​ໃນ ສປປ ລາວ. ​​ລະຫວ່າງ ວັນ​ທີ 16-17 ມິຖຸນາ 2011, ທີ່ ​ໂຮງ​ແຮມ ລາວ​ພລາຊາ.

ຈຸດປະສົງ​ຂອງ​ກອງ​ປະຊຸມ​ຄັ້ງ​ນີ້​ແມ່ນ​ເພື່ອ​​ເປີດ​ໂອກາດໃຫ້​ພະນັກງານ​ວິຊາ​ການ​ຂອງ ສ ປປ ລາວ ​ໄດ້​ມີ​ການ​​ແລກປ່ຽນ​ຄວາມ​ຮູ້ ​ແລະ ປະສົບ​ການ​ກັບ​ບັນດາ​ຊ່ຽວຊານທີ່​ມາ​ຈາກ​ຕ່າງປະ​ເທດ ​ເພື່ອ​ຈະ​ສາມາດ​ນຳ​ເອົາ ​ເຕັກ​ໂນ​ໂລ​ຊີ ອາ​ວະ​ກາດ ມາໝູນ​ໃຊ້​ໃນ​ການ​ພັດທະນາ​ແບບຍືນ​ຍົງ​ຕໍ່​ໄປ. ໂຄງການ​ຕົວ​ແບບ​ຂອງ​ວຽກ​ງານ​ການ​ນຳ​ໃຊ້ ​ເຕັກ​ໂນ​ໂລ​ຊີ ອາ​ວະ​ກາດ ​ເພື່ອ​ສິ່ງ​ແວດ​ລ້ອມ​ ​ແມ່ນ​ມີ​ຄວາມ​ສຳຄັນ​ຫຼາຍ​ຕໍ່​ກັບ​ຂະ​ແໜງ​ການ​ຕ່າງໆ ທີ່​ກ່ຽວຂ້ອງ​ຢູ່ ສປປ ລາວ ​ເພາະວ່າ ວຽກ​ງານ​ດັ່​ງກ່າວ​ຈະ​ໄດ້​ສະໜັບ​ສະ​ໜູນ ​ແລະ ຊ່ວຍ​ເຫຼືອ ​ໃຫ້​ແກ່​ການ​ດຳ​ເນີນ​ງານ ຕາມ​ແຜນ​ການ​ພັດທະນາ ​ເສ​ດຖະກິດ-ສັງຄົມ ​ແລະ ຂໍ້​ມູນ​-ຂ່າວສານ​ທາງ​ພື້ນ​ທີ່ ​ເພື່ອ​ໃຫ້​ຖືກ​ຈັດ​ຕັ້ງປະຕິບັດ​ຕາມ​ແຜນ​ຍຸດ​ທະ​ສາດ ​ເພື່ອ​ການ​ຂະຫຍາຍຕົວ ​ແລະ ລົບ​ລ້າງ​ຄວາມທຸກ​ຍາກ​ຂອງ ສປປ ລາວ ​ແລະ ສະໜັບສະໜູນ​ການ​ດຳ​ເນີນ​ງານ​ແຜນ 5 ປີ ​ໄລຍະ 2011-2015. ​ຜົນ​ກະທົບ​ຂອງ​ການ​ປ່ຽນ​ແປງ​ດິນ​ຟ້າ​ອາກາດ ຕໍ່​ກັບ​ຂົງ​ເຂດ​ແມ່​ນ້ຳຂອງ ​ແລະ ​ແຫຼ່ງຊັບພະຍາກອນ​ທີ່​ກ່ຽວຂ້ອງ ​ແມ່ນ​ເຫດຜົນ​ຫຼັກ​ຂອງ ລະບົບຕິດຕາມ​ການ​ປ່ຽນ​ແປງ​ດິນ​ຟ້າ​ອາກາດ ​ໃນ ສປປ ລາວ. ຜົນ​ກະທົບ​ສິ່​ງ​ແວດ​ລ້ອມ​ທີ່​ກ່ຽວ​ພັນ​ກັບ​ການ​ປ່ຽນ​ແປງ​ດິນ​ຟ້າ​ອາກາດ​ນັ້ນ ບໍ່​ພຽງ​ແຕ່​ເປັນ​ບັນຫາ​ທົ່ວ​ປະ​ເທດ, ​ແຕ່​ມັນ​ຍັງ​ເປັນ​ບັນຫາ​ຂອງ​ພື້ນ​ທີ່​ລຸ່ມ​ແມ່​ນ້ຳຂອງ ​ໂດຍ​ສະ​ເພ​າະຢ່າງ​ຍິ່ງ ການ​ອະນຸລັກ ​ແລະ​ ຄຸ້ມ​ຄອງ​ພື້ນ​ທີ່​ປ່າ​ໄມ້​ຕາມ​ບັນດາ​ສາຂາ​ແມ່​ນ້ຳຕ່າງໆ ​ທີ່​ໄດ້​ປະສົບ​ກັບ​ບັນຫາ​ຂອງ​ການ​ປ່ຽນ​ແປງ​ດິນ​ຟ້າ​ອາກາດ. ສ ປປ ລາວ ກໍ່ຄື ສະຖາບັນຄົ້ນຄວ້າ ຊັບພະຍາກອນນ້ຳ ແລະ ສິ່ງແວດລ້ອມ ແມ່ນມີຄວາມຕ້ອງການ ຂໍ້ມູນທາງດ້ານວິທະຍາສາດ ສູງ ເພື່ອການຈຳລອງສະພາບ ແລະ ການຕິດຕາມກວດກາສິ່ງແວດລ້ອມທາງທຳມະຊາດ ແບບຕໍ່ເນື່ອງ. ສະນັ້ນ ເຕັກໂນໂລຊີລະດັບສູງ ເຊັ່ນ: ການນຳໃຊ້ເຕັກໂນໂລຊີອາວະກາດ ສຳລັບ ຂໍ້ມູນຂ່າວສານທາງພື້ນທີ່ ກໍ່ຄື ເຕັກໂນໂລຊີສືບຢັ່ງທາງໄກ ແລະ ລະບົບຂໍ້ມູນຂ່າວສານພູມີສາດ ແມ່ນມີ ຄວາມສຳຄັນຫຼາຍ ຕໍ່ກັບຂົງເຂດວຽກງານ ເຊັ່ນ: ການຕິດຕາມກວດກາປ່າໄມ້, ການປ່ຽນແປງດິນຟ້າອາກາດ, ການຕິດຕາມກວດກາໄພພິບັດ ທຳມະຊາດ, ໄພແຫ້ງແລ້ງ-ໄພນ້ຳຖ້ວມ, ແຜ່ນດິນໄຫວ, ໄຟປ່າ ແລະ ອື່ນໆ.