|
(ຂປລ) ຂໍ້ລິເລີ່ມເພື່ອຊ່ວຍສາມເສັ້ນທາງຂົນສົ່ງທີ່ເປັນບູລິມະສິດ ໃນອະນຸພາກພື້ນແມ່ນ້ຳ ຂອງ (GMS) ໃຫ້ກາຍເປັນແລວທາງເສດຖະກິດ ຢ່າງເຕັມປ່ຽມ ຈະໄດ້ຮັບການຕົກລົງໃນກອງປະຊຸມເວທີແລວທາງເສດຖະກິດຄັ້ງທີສາມ (ECF-3) ທີ່ຈະຖືກຈັດຂຶ້ນໃນວັນທີ 30 ມິຖຸນາ 2011 ທີ່ນະຄອນຫລວງວຽງຈັນ ສປປ ລາວ.
ບັນດາລັດຖະມົນຕີ ແລະ ເຈົ້າຫນ້າທີ່ອາວຸໂສຈາກລາຊະອານາຈັກ ກຳປູເຈຍ, ສປຈີນ, ສປປລາວ, ສະຫະພາບມຽນມາ, ລາຊະອານາຈັກໄທ ແລະ ສສ ຫວຽດ ນາມ ພ້ອມທັງບັນດາຕົວແທນຈາກພາກເອກະຊົນ ແລະ ຄູ່ຮ່ວມພັດທະນາ ຈະປຶກສາຫາລືກັນວ່າ ຈະເຮັດແນວໃດ ເພື່ອຈະ ສືບຕໍ່ພັດທະນາ ແລວທາງເສດຖະກິດ ເຫນືອ-ໃຕ້ (NSEC), ແລວທາງເສດຖະກິດ ຕາເວັນອອກ-ຕາເວັນຕົກ (EWEC) ແລະ ແລວທາງເສດຖະກິດຕອນໃຕ້ (SEC) ໃຫ້ເກີດຜົນປະໂຫຍດ ສູງສຸດ.
ຈາກການສັງລວມເອົາຜົນຂອງບັນດາກອງປະຊຸມສຳມະນາ ວິຊາການ ທີ່ໄດ້ຈັດຂຶ້ນກ່ອນຫນ້ານີ້, ກອງປະຊຸມ ECF-3 ຈະຕົກລົງກ່ຽວກັບການດຳເນີນງານ ສະເພາະ ຕໍ່ບັນຫາລວມຂອງສາມແລວທາງ ເປັນຕົ້ນ ສິ່ງກີດຂວາງ ແລະ ບັນດາມາດຕະການ ເພື່ອເພີ່ມທະວີ ການອຳນວຍຄວາມສະດວກດ້ານການຂົນສົ່ງ ແລະ ການຄ້າ ແລະ ການພັດທະນາໂລຈິສຕິກ, ການຍັງຂາດການ ເຊື່ອມຕໍ່ທີ່ໃຊ້ການໄດ້ໃນບາງເສັ້ນທາງ, ການຂາດສິ່ງອຳນວຍຄວາມສະດວກ ໃນຈຸດຜ່ານ ແດນ, ການຂາດນາຍຫນ້າແລ່ນພາສີ ແລະ ການບໍລິການທະນາຄານ, ເວລາເປີດຈຳກັດ ສຳລັບການບໍລິການ ການກວດກາພາສີ, ຄວາມຊັກຊ້າໃນການແຈ້ງ ເອກະສານ ແລະ ຂັ້ນຕອນຕ່າງໆ, ບັນຫາຄວາມປອດໄພ ແລະ ການຍັງຕ້ອງປ່ຽນຖ່າຍສິນຄ້າຢູ່ຕາມຊາຍແດນ.
ກອງປະຊຸມເທື່ອນີ້ ມີຫົວຂໍ້ວ່າ “ສ້າງຄວາມເຂັ້ມໃຫ້ແກ່ເສັ້ນທາງສູ່ຄວາມກ້າວຫນ້າທີ່ຍືນຍົງ ໃນອະນຸພາກພື້ນແມ່ນ້ຳຂອງ” ຈັດຂຶ້ນໂດຍທະນາຄານພັດທະນາອາ ຊີ (ADB) ພາຍໃຕ້ແຜນງານການຮ່ວມມືດ້ານເສດຖະກິດ GMS ເຊິ່ງ ສປປລາວ ເປັນປະເທດເຈົ້າພາບ. ບັນດາປະເທດແມ່ນ້ຳ ຂອງໄດ້ຕົກລົງສ້າງແລວ ທາງເສດຖະກິດ ເພື່ອໃຫ້ຫລາຍໆພາກສ່ວນຂອງອະນຸພາກພື້ນ ເຊື່ອມຕໍ່ກັບບັນດາຕະຫລາດໃຫຍ່ໆ ໂດຍທີ່ມີຫລາຍບ່ອນຮັບໃຊ້ເປັນສູນການຜະລິດ, ການຄ້າ ແລະ ການພັດທະນາວິສາຫະກິດ. ບັນດາແລວທາງເຫລົ່ານີ້ ຂະຫຍາຍຜົນປະໂຫຍດທີ່ເກີດຈາກ ການເຊື່ອມຕໍ່ ດ້ານການຂົນສົ່ງ ທີ່ໄດ້ຮັບການປັບປຸງຂຶ້ນ ກັບ ເຂດຕ່າງໆ ທີ່ຢູ່ຫ່າງໄກ ແລະ ບໍ່ຕິດຈອດກັບທະເລ ໃນອະນຸພາກພື້ນ ເຊິ່ງເສຍປຽບດ້ານຜົນປະໂຫຍດ ຍ້ອນຂາດການລວມຕົວກັບເຂດທີ່ໃກ້ຄຽງ ທີ່ພັດທະນາ ແລະ ມີທີ່ຕັ້ງດີກວ່າ. ໂອກາດສຳລັບການລົງທຶນຈາກພາຍໃນ ແລະ ນອກອະນຸພາກພື້ນ ຈະໄດ້ຖືກເປີດອອກ ເພື່ອສົ່ງເສີມການຮ່ວມກຳລັງແຮງ ແລະ ເພີ່ມທະ ວີຜົນໄດ້ຮັບຈາກບັນດາກິດຈະກຳຂອງ GMS .
ທ່ານອາຣຢຸນ ໂກສະວາມີ, ຫົວຫນ້າພະແນກການຮ່ວມມືພາກພື້ນ ແລະ ປະສານງານການດຳເນີນງານ, ກົມອາຊີ ຕາເວັນອອກສຽງໃຕ້ ຂອງທະນາຄານພັດ ທະນາອາຊີ ກ່າວວ່າ: *ນອກຈາກໂຄງລ່າງພື້ນຖານດ້ານກາຍະພາບແລ້ວ, ການລົງທຶນໃນດ້ານຊອບແວຣ ກໍຈະມີຜົນຕອບແທນທີ່ດີ ເຂດທີ່ຢູ່ຕາມບັນດາແລວ ທາງເສດຖະກິດ ຈະສາມາດໄດ້ຮັບຜົນປະໂຫຍດຕໍ່ໄປ ຈາກຕະຫລາດທີ່ໄດ້ມີການຂະຫຍາຍຕົວ, ມີລະບົບການອຳນວຍຄວາມສະດວກທີ່ແຫນ້ນຫນາ*.
ທ່ານຍັງໄດ້ກ່າວຕື່ມອີກວ່າ: ບັນດາແລວທາງເສດຖະກິດ ຈະສົ່ງເສີມການຮ່ວມມືເຊິ່ງກັນແລະກັນ ທີ່ນຳຜົນປະໂຫຍດມາສູ່ແຕ່ລະຝ່າຍ ແລະ ມີຄວາມດຸນດ່ຽງ ແລະ ຍືນຍົງ, ປະກອບສ່ວນເຂົ້າໃນວິໄສທັດ ຂອງປະຊາຄົມເສດຖະກິດອາຊຽນ.
ຫົວຂໍ້ອື່ນໆ ທີ່ຈະຖືກນຳມາປຶກສາຫາລືກັນ ໃນໄລຍະກອງປະຊຸມ ECF-3 ໄດ້ແກ່ຄວາມສຳຄັນຂອງການປັບປຸງ ຄວາມສາມາດແຂ່ງຂັນ ຂອງບັນດາສູນ ກາງທີ່ສຳຄັນ ຂອງແລວທາງ ແລະ ຄວາມຈຳເປັນໃນການຊຸກຍູ້ ການເຊື່ອມໂຍງກັນ ລະຫວ່າງຂະແຫນງການ ໃນການແກ້ໄຂບັນຫາ ການພັດທະນາແລວທາງ GMS. ທະນາຄານພັດທະນາອາຊີ (ADB) ເຊິ່ງມີສຳນັກງານໃຫຍ່ຕັ້ງຢູ່ ມະນີລາ ປະເທດຟິລິບປິນ ແມ່ນອຸທິດຕົນເຂົ້າໃນການຫລຸດຜ່ອນຄວາມທຸກຍາກໃນອາຊີ ແລະ ປາຊີຟິກ ຜ່ານການຂະຫຍາຍຕົວດ້ານເສດຖະກິດຢ່າງຮອບດ້ານ, ການຂະຫຍາຍຕົວທີ່ຍືນຍົງດ້ານສິ່ງແວດລ້ອມ ແລະ ມີການລວມຕົວໃນພາກພື້ນ. ທະນາຄານພັດທະນາອາຊີ ໄດ້ຖືກສ້າງຕັ້ງຂຶ້ນໃນປີ 1966, ມີ 67 ປະເທດ ເປັນສະມາຊິກ, ໃນນັ້ນ 48 ປະເທດ ແມ່ນຢູ່ໃນພາກພື້ນ. ໃນປີ 2010 ທະນາຄານ ພັດທະນາ ອາຊີ ໄດ້ໃຫ້ການອະນຸມັດລວມທັງການປະກອບທຶນລວມທັງຫມົດ 17,51 ຕື້ໂດລາ, ນອກຈາກນັ້ນ ແຜນງານການເງິນ ສຳລັບການຄ້າ ທີ່ພວມດຳ ເນີນຢູ່ ຂອງທະນາຄານພັດທະນາອາຊີ ໄດ້ໃຫ້ການສະຫນັບສະຫນູນ ໃນການຄ້າ ຈຳນວນ 2,8 ຕື້ໂດລາ. |
