|
ຕອນເຊົ້າວັນທີ 15 ສິງຫາ 2011 ນີ້ ທ່ານ ຈູມມາລີ ໄຊຍະສອນ ເລຂາທິການໃຫຍ່ຄະນະບໍລິຫານສູນກາງພັກ ປະທານປະເທດ ແຫ່ງ ສປປ ລາວ ໄດ້ໃຫ້ກຽດເຂົ້າຮ່ວມ ແລະ ໂອ້ລົມຕໍ່ກອງປະຊຸມຄັ້ງປະຖົມມະລຶກຂອງຄະນະລັດຖະບານ ຊຸດທີ VII ທີ່ຫ້ອງປະຊຸມຄະນະລັດຖະບານ ໂດຍເປັນປະທານຂອງທ່ານ ທອງສິງ ທຳມະວົງ ກຳມະການກົມການເມືອງສູນກາງພັກ ນາຍົກລັດຖະມົນຕີ ໂດຍມີບັນດາທ່ານຮອງນາຍົກລັດຖະມົນຕີ ລັດຖະມົນຕີວ່າການ ຊ່ວຍວ່າການ ແລະ ຫົວໜ້າ ຮອງຫົວໜ້າ ອົງການທຽບເທົ່າ ເຂົ້າຮ່ວມ.
ໃນພິທີທ່ານນາຍົກລັດຖະມົນຕີ ຕາງໜ້າໃຫ້ຄະນະລັດຖະບານຊຸດໃໝ່ ໄດ້ຂຶ້ນລາຍງານໂດຍຫຍໍ້ກ່ຽວກັບໜາກຜົນການປະຕິບັດງານຂອງຄະນະ ລັດຖະບານຊຸດກ່ອນ (ຊຸດທີ VI) ແລະ ໜ້າທີ່ສະເພາະໜ້າຂອງຄະນະລັດຖະບານຊຸດໃໝ່ ເຊິ່ງເຫັນວ່າ ຄະນະລັດຖະບານຊຸດທີ VI ຫຼັງຈາກໄດ້ຮັບການແຕ່ງຕັ້ງຈາກປະທານປະເທດ ກໍໄດ້ເຄື່ອນໄຫວບໍລິຫານວຽກງານຢ່າງຕັ້ງໜ້າ ເປັນລະບົບຕະຫຼອດມາ ເຖິງວ່າສະພາບການຂອງໂລກ ແລະ ພາກພື້ນຈະມີການຜັນແປຢ່າງສັບສົນໄວວາ ແລະ ມີສິ່ງທ້າທາຍທົດສອບຫຼາຍປະການ ແຕ່ດ້ວຍຄວາມບຸກບືນສູ້ຊົນຂອງປະຊາຊົນບັນດາເຜົ່າ ແລະ ບັນດາຊັ້ນຄົນ ກໍຄືການຊີ້ນຳ-ນຳພາຂອງພັກ ອົງການປົກຄອງທ້ອງຖິ່ນຂອງບັນດາກະຊວງ ແລະ ອົງການລັດຖະບານ ພາຍໃຕ້ການຊີ້ນຳຢ່າງໃກ້ຊິດເປັນປະຈຳຂອງກົມການເມືອງສູນກາງພັກ ປະເທດຊາດຂອງພວກເຮົາສືບຕໍ່ມີສະຖຽນລະພາບທາງດ້ານການເມືອງຢ່າງ ໜັກແໜ້ນ ມີຄວາມເປັນລະບຽບຮຽບຮ້ອຍດ້ານສັງຄົມ ເສດຖະກິດ-ວັດທະນະທຳຂະຫຍາຍຕົວຢ່າງຕໍ່ເນື່ອງ ແລະ ບັນລຸຄາດໝາຍທີ່ກອງປະຊຸມໃຫຍ່ຄັ້ງທີ VIII ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ VI ກຳນົດໄວ້ ບົດບາດອິດທິພົນຂອງ ສປປ ລາວ ພົ້ນເດັ່ນຂຶ້ນໃນເວທີສາກົນ.
ຄຽງຄູ່ກັບຜົນສຳເລັດທີ່ຍາດມາໄດ້ນັ້ນ ຍັງມີຈຸດອ່ອນຂໍ້ຄົງຄ້າງຈຳນວນໜຶ່ງ ເຊິ່ງມັນເລັ່ງທວງໃຫ້ລັດຖະບານຊຸດໃໝ່ ຕ້ອງເພີ່ມທະວີຄວາມຮັບຜິດຊອບໃນການປະຕິບັດພາລະບົດບາດຂອງຕົນ ດ້ວຍຄວາມບຸກບືນກ່ວາເກົ່າ ເພື່ອຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງພັກ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VII ກໍຄືການສ້າງບາດກ້າວບຸກທະລຸທັງ 4 ດ້ານທີ່ກອງປະຊຸມໃຫຍ່ຄັ້ງທີ IX ຂອງພັກ ໄດ້ວາງອອກ.
ກ່ຽວກັບໜ້າທີ່ຈຸດສຸມຂອງຄະນະລັດຖະບານຊຸດໃໝ່ ລັດຖະບານໄດ້ວາງນະໂຍບາຍ "ເພີ່ມທະວີຄວາມສັກສິດ ແລະ ປະສິດທິຜົນໃນການບໍລິຫານ ແລະ ຄຸ້ມຄອງລັດ-ສັງຄົມ ເພື່ອເຮັດແນວໃດຈຶ່ງຈະສ້າງບາດກ້າວບຸກທະລຸອັນໜັກແໜ້ນ ໃນການນຳພາປະເທດຊາດ ໃຫ້ຫຼຸດພົ້ນອອກຈາກສະຖານະພາບຂອງປະເທດດ້ອຍພັດທະນາ ໃນປີ 2020 ສຳເລັດເປົ້າໝາຍສະຫັດສະວັດດ້ານການພັດທະນາ ໃນປີ 2015 ແລະ ເຮັດແນວໃດຈຶ່ງຈະຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 7 ຢ່າງມີໄຊ ນີ້ແມ່ນໜ້າທີ່ສະເພາະໜ້າ ແລະ ຄວາມຮັບຜິດຊອບໂດຍກົງຂອງລັດຖະບານຊຸດທີ VII ທີ່ຈະຕ້ອງພ້ອມກັນປະຕິບັດໃຫ້ປະກົດຜົນເປັນຈິງ.
ເພື່ອເຮັດໃຫ້ 4 ຈຸດໝາຍລວມທີ່ກອງປະຊຸມໃຫຍ່ຄັ້ງທີ IX ຂອງພັກ ວາງອອກ ໄດ້ຮັບການຈັດຕັ້ງປະຕິບັດໃຫ້ເປັນຈິງ ລັດຖະບານໄດ້ກຳນົດ 6 ແຜນງານຈຸດສຸມ.
ເພື່ອເປັນພື້ນຖານການຈັດຕັ້ງປະຕິບັດວຽກງານຈຸດສຸມໃນ 5 ປີຕໍ່ໜ້າຂອງຄະນະລັດຖະບານຊຸດໃໝ່ ໃນກອງປະຊຸມນີ້ ທ່ານ ຈູມມາລີ ໄຊຍະສອນ ຕາງໜ້າໃຫ້ກົມການເມືອງສູນກາງພັກ ໄດ້ໃຫ້ກຽດໂອ້ລົມ ໂດຍທ່ານໄດ້ເນັ້ນໜັກຫຼາຍບັນຫາ ໂດຍສະເພາະ 6 ບັນຫາທີ່ລັດຖະບານຊຸດໃໝ່ ຈະຕ້ອງໄດ້ສຸມໃສ່ຈັດຕັ້ງປະຕິບັດໃຫ້ບັນລຸຜົນສຳເລັດຄື:
ໜຶ່ງ: ດ້ານ ການພັດທະນາເສດຖະກິດ ຕ້ອງຊຸກຍູ້ສົ່ງເສີມການຜະລິດເປັນສິນຄ້າ ໂດຍອີງໃສ່ທ່າແຮງຂອງແຕ່ລະທ້ອງຖິ່ນ ແກ້ໄຂລະບອບລະບຽບທີ່ເປັນການກົດໜ່ວງຂອງການຈໍລະຈອນສິນຄ້າ ເອົາໃຈໃສ່ປັບປຸງເສດຖະກິດຂອງລັດ ແກ້ໄຂປະກົດການຫຍໍ້ທໍ້ຢູ່ໃນຂົງເຂດດັ່ງກ່າວ ເພີ່ມທະວີການຂົນຂວາຍຍາດແຍ່ງເອົາການລົງທຶນຈາກຕ່າງປະເທດລົງ ໃສ່ຂົງເຂດຕ່າງໆທີ່ມີທ່າແຮງໃຫ້ຫຼາຍຂຶ້ນ ເພື່ອຫຼຸດຜ່ອນການກູ້ຢືມເງິນຈາກຕ່າງປະເທດ
ສອງ: ດ້ານ ການແກ້ໄຂຄວາມທຸກຍາກຂອງປະຊາຊົນ ລັດຖະບານຕ້ອງມີນະໂຍບາຍລະອຽດຄື: ຕ້ອງສ້າງຄວາມຮູ້ໃຫ້ປະຊາຊົນ ຕ້ອງພັດທະນາພື້ນຖານໂຄງລ່າງເພື່ອຮັບປະກັນການດຳລົງຊີວິດຂອງ ປະຊາຊົນ ສ້າງເງື່ອນໄຂອັນສະດວກໃຫ້ເຂົາເຈົ້າມີພື້ນທີ່ທຳການຜະລິດ ຕ້ອງມີການຈັດຕັ້ງນຳພາສົ່ງເສີມການຜະລິດເປັນສິນຄ້າ ຈັດສັນແຫຼ່ງທຶນໃຫ້ເໝາະສົມ ຕ້ອງກຳນົດຈຸດສຸມເຂດພັດທະນາ ໂດຍສຸມໃສ່ເຂດຊົນນະບົດ ແລະ ເຂດວິລະຊົນ ສຸມໃສ່ການສ້າງວຽກເຮັດງານທຳໃຫ້ປະຊາຊົນຫຼາຍຂຶ້ນ ປັບປຸງການຂຸດຄົ້ນລາຍຮັບ ແກ້ໄຂປະກົດການຫຍໍ້ທໍ້ ກຳຈັດປັດເປົ່າການສໍ້ໂກງ ແກ້ໄຂໜີ້ສິນຄຸມເຄືອຍາວນານ ເຊີດຊູສະຕິ ແລະ ຄວາມເຂັ້ມງວດ ຄົ້ນຄ້ວາການລົງທຶນໃດໜຶ່ງໃຫ້ຈະແຈ້ງ ອັນໃດຢູ່ໃນຄວາມຮັບຜິດຊອບຂອງສູນກາງ ແລະ ທ້ອງຖິ່ນ ແລະ ສັງຄົມມີສ່ວນຮ່ວມຕັ້ງໜ້າປະຕິບັດເສດຖະກິດກົນໄກຕະຫຼາດ ໃຫ້ຢຸດຕິການອະນຸຍາດນັກລົງທຶນສຳປະທານຂຸດຄົ້ນແຮ່ ແລະ ການສົ່ງໄມ້ທ່ອນອອກຕ່າງປະເທດ ທີ່ມີຜົນກະທົບຕໍ່ສິ່ງແວດລ້ອມອັນຍາວນານ ພ້ອມນີ້ການລົງທຶນໂຄງການປູກຢາງພາລາ ກໍຄວນໂຈະ ເພາະປູກໄປຫຼາຍແລ້ວຢ້ານແຮງງານເກັບກູ້ຜົນຜະລິດໃນຕໍ່ໜ້າບໍ່ ພຽງພໍ ແລະ ບັນຫາໜຶ່ງອີກ ມີຜົນກະທົບຕໍ່ເນື້ອທີ່ທຳການຜະລິດຂອງປະຊາຊົນຢູ່ແຕ່ລະ ທ້ອງຖິ່ນ ໃຫ້ຫັນມາປູກພືດອັນໃດທີ່ແກ້ໄຂຄວາມທຸກຍາກໄດ້ໄວກ່ວາ ແລະ ໄດ້ຫຼາຍກ່ວາ ເປັນຕົ້ນ ປູກມັນຕົ້ນ ສາລີ ອ້ອຍ ແລະ ອື່ນໆ ອັນມີລາຍຮັບໄວຕໍ່ປະຊາຊົນ ສືບຕໍ່ກຳຈັດໄພວ່າງງານ ໄພເງິນເຟີ້ ປັບປຸງທະນາຄານໃຫ້ເຂັ້ມແຂງ ເອົາໃຈໃສ່ຄຸ້ມຄອງການລົງທຶນຂອງລັດ ແລະ ແກ້ໄຂບັນຫາການນຳເຂົ້າລົດມືສອງຈາກຕ່າງປະເທດ ຖ້າເປັນໄປໄດ້ໃຫ້ຢຸດ ເພາະປັດຈຸບັນການເພີ່ມຂຶ້ນຂອງລົດຢູ່ປະເທດເຮົານັບມື້ຫຼາຍຂຶ້ນ ອັນມີຜົນກະທົບຕໍ່ການສັນຈອນ ແລະ ບັນຫານ້ຳມັນ
ສາມ: ລັດຖະບານ ຕ້ອງເອົາໃຈໃສ່ພັດທະນາວັດທະນະທຳ-ສັງຄົມ ຄຽງຄູ່ກັບການພັດທະນາເສດຖະກິດ ສ້າງສະພາບສັງຄົມໃຫ້ມີຄວາມສະຫງົບປອດໄສ ແລະ ອື່ນໆ ເພື່ອຍົກຊີວິດການເປັນຢູ່ຂອງປະຊາຊົນນັບມື້ດີຂຶ້ນ ບໍ່ໃຫ້ມີການແຕກໂຕນຫຼາຍລາຍຮັບລະຫວ່າງ ຜູ້ຮັ່ງ ແລະ ຜູ້ທຸກ
ສີ່: ເພີ່ມ ທະວີວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອເຮັດໃຫ້ປະເທດເຮົາມີຄວາມສະຫງົບ ການແກ້ໄຂປະກົດການຫຍໍໍ້ທໍ້ໃນສັງຄົມຕ້ອງມີມາດຕະການລະອຽດ ສືບຕໍ່ເຮັດວຽກງານຮາກຖານເປັນປະຈຳ ປົກກະຕິເພື່ອບັນລຸ 4 ເນື້ອໃນ 4 ຄາດໝາຍ ໂດຍຫັນເອົາພະນັກງານວິຊາການທີ່ມີຄວາມຮູ້ຄວາມສາມາດຢູ່ແຕ່ລະ ຂະແໜງການ ລົງໄປພັດທະນາຢູ່ທ້ອງຖິ່ນ ປັບປຸງກຳລັງປ້ອງກັນຊາດ-ປ້ອງກັນຄວາມສະຫງົບໃຫ້ໜັກແໜ້ນເຂັ້ມແຂງ ແລະ ເປັນທີ່ໄວ້ເນື້ອເຊື່ອໃຈຂອງປະຊາຊົນ
ຫ້າ: ສືບຕໍ່ ບຸກບືນການຮ່ວມມືກັບບັນດາປະເທດພາຍນອກ ໂດຍສະເພາະໃຫ້ເອົາໃຈໃສ່ເພີ່ມທະວີການຮ່ວມມືກັບປະເທດເພື່ອນ ມິດຍຸດທະສາດ ແລະ
ຫົກ: ລັດຖະບານຕ້ອງເອົາໃຈໃສ່ ປັບປຸງແກ້ໄຂເອົາພະນັກງານບັນຈຸເຂົ້າແຕ່ລະຕຳແໜ່ງບໍລິຫານລັດ ໃຫ້ເໝາະສົມກັບສະພາບໃນປັດຈຸບັນ ເອົາໃຈໃສ່ປັບປຸງການເຮັດວຽກໃຫ້ໄປຕາມກົນໄກ ແລະ ໃຫ້ເອົາໃຈໃສ່ປະຕິບັດການບໍລິການດ້ວຍລະບົບປະຕູດຽວ ເພື່ອໃຫ້ການບໍລິການວ່ອງໄວທັນເວລາ ພ້ອມກັນກໍຕ້ອງແກ້ໄຂບັນດາຂອດການສວຍໃຊ້ໂອກາດໜ້າທີ່ຕຳແໜ່ງ ເຮັດແນວບໍ່ຖືກຕ້ອງ.
ກ່ອນໜ້ານີ້ ໃນຕອນເຊົ້າຂອງວັນດຽວກັນ ຄະນະລັດຖະບານຊຸດທີ VII ນຳໂດຍທ່ານ ທອງສິງ ທຳມະວົງ ກຳມະການກົມການເມືອງສູນກາງພັກ ນາຍົກລັດຖະມົນຕີ ຍັງໄດ້ເຂົ້າວາງພວງມາລາທີ່ອະນຸສາວະລີນັກຮົບນິລະນາມ (ດາວແດງ) ຕໍ່ໜ້າເດີ່ນສະພາແຫ່ງຊາດ ເພື່ອລະນຶກເຖິງຄຸນງາມຄວາມດີຂອງນັກຮົບປະຕິວັດ ຜູ້ທີ່ເສຍສະຫຼະຊີວິດ ແລະ ເລືອດເນື້ອ ເພື່ອຊາດ ເພື່ອປະຊາຊົນ ໃນການຕໍ່ສູ້ກູ້ຊາດ ຍາດເອົາເອກະລາດ ອະທິປະໄຕ ມາສູ່ປະຊາຊົນລາວບັນດາເຜົ່າ.
|
