|
ກອງປະຊູມປຶກສາຫາລື ເພື່ອທົບທວນການຈັດຕັ້ງປະຕິບັດ 3 ສົນທິສັນຍາສາກົນ ຮິໂອ
ດ້ານສິ່ງແວດລ້ອມ ແລະ ເພື່ອກະກຽມດຳເນີນປະເມີນຜົນການຈັດຕັ້ງປະຕິບັດຖະແຫຼງການ
ຂອງ ຮິໂອ ດ້ານສິ່ງແວດລ້ອມ ແລະ ພັດທະນາພາຍຫຼັງ 20 ປີ(1992-2012), ຄັ້ງວັນທີ 26-27 ກັນຍາ 2011
ກົມ ສິ່ງແວດລ້ອມ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຈັດກອງປະຊຸມປຶກສາຫາລືທົບທວນການຈັດຕັ້ງປະຕິບັດສົນທິສັນຍາ ຣີໂອ ເພື່ອກຽມເຂົ້າຮ່ວມກອງປະຊຸມຣີໂອ ຄົບຮອບ 20 ປີ ໂດຍການເປັນປະທານຂອງ ທ່ານ ດຣ.ນາງ ວຽງສະຫວັນ ດວງສະຫວັນ ຫົວໜ້າກົມສິ່ງແວດລ້ອມ, ທ່ານຜູ້ຕາງໜ້າຈາກຫ້ອງການກົດໝາຍ ອົງການສະຫະປະຊາຊາດເພື່ອສິ່ງແວດລ້ອມ, ຈາກສຳນັກງານ, ອົງການ ແລະ ພາກສ່ວນກ່ຽວຂ້ອງເຂົ້າຮ່ວມ.
ສຳລັບ ສປປ ລາວ ພາຍຫຼັງລັດຖະບານ ໄດ້ຮັບຮອງເອົາແຜນດຳເນີນງານປ່າໄມ້ເຂດຮ້ອນ ໃນປີ 1989 ປະກາດໃຊ້ລັດຖະທຳມະນູນ ໃນປີ 1991 ໄດ້ລະບຸວຽກງານປົກປັກຮັກສາສິ່ງແວດລ້ອມ ໃນມາດຕາ 17 ທຸກພາກສ່ວນຕ້ອງປົກປັກຮັກສາສິ່ງແວດລ້ອມ ຊັບພະຍາກອນທຳມະຊາດ ໜ້າດິນ ພື້ນດິນ ປ່າໄມ້ ສັດ ແຫຼ່ງນ້ຳ ແລະ ອາກາດ.
ພາຍຫຼັງ 1 ປີ ຈາກກອງປະຊຸມຣີໂອ ປີ 1993 ອົງການວິທະຍາສາດ ເຕັກໂນໂລຊີ ແລະ ສິ່ງແວດລ້ອມ ໄດ້ຮັບການສ້າງຕັ້ງຂຶ້ນ ເພື່ອເຮັດໜ້າທີ່ປະສານງານ ແລະ ຄຸ້ມຄອງມະຫາພາກ ພ້ອມກັບການຈັດຕັ້ງຜັນຂະຫຍາຍເນື້ອໃນຈິດໃຈຂອງກອງປະຊຸມຣີໂອ ປະຕິບັດນະໂຍບາຍສົນທິສັນຍາຍຸດທະສາດ ເຂົ້າຮ່ວມເປັນພາຄີບັນດາສົນທິສັນຍາສິ່ງແວດລ້ອມສາກົນ ໄດ້ສຳເລັດການປະຕິບັດໂຄງການສ້າງບົດລາຍງານການປະເມີນຜົນຄວາມ ສາມາດດ້ວຍຕົນເອງ ໃນການຈັດຕັ້ງ 3 ສົນທິສັນຍາສາກົນຣີໂອ ດ້ານສິ່ງແວດລ້ອມ ໃນປີ 2009 ແລະ ກຳລັງດຳເນີນການຈັດຕັ້ງປະຕິບັດໂຄງການເຜີຍແຜ່ບັນດານິຕິກຳ ກ່ຽວກັບ 3 ສົນທິສັນຍາດັ່ງກ່າວ ໂຄງການຜັນຂະຫຍາຍບົດລາຍງານການປະເມີນຄວາມສາມາດການປະຕິບັດ ດ້ານສິ່ງແວດລ້ອມຂອງຣີໂອ 2011.
ສຳລັບແຜນໃນຕໍ່ໜ້າ ແມ່ນການຜັນຂະຫຍາຍແຜນການປະຕິບັດງານພາກພື້ນ ສຳລັບອາຊີ-ປາຊີຟິກ ເພື່ອການພັດທະນາແບບຍືນຍົງ 2011-2015 ໃຫ້ເປັນແຜນປະຕິບັດງານແຫ່ງຊາດ ພ້ອມທັງເອົາໃຈໃສ່ສ້າງຍຸດທະສາດ ແລະ ແຜນດຳເນີນງານວ່າດ້ວຍການພັດທະນາສີຂຽວ ເຊິ່ງຜູ້ເຂົ້າຮ່ວມກອງປະຊຸມໃນຄັ້ງນີ້ ຈະໄດ້ພ້ອມກັນປຶກສາຫາລື ຄົ້ນຄ້ວາ ກະກຽມຄວາມພ້ອມ ເຂົ້າຮ່ວມກອງປະຊຸມສຸດຍອດໂລກ ກ່ຽວກັບການພັດທະນາແບບຍືນຍົງ ທີ່ຈະມີຂຶ້ນໃນປີ 2012 ທີ່ກຸງຣີໂອ ປະເທດບຣາຊິນ. |
