|
ກອງປະຊຸມສະພາມົນຕີ ຄະນະກຳມາທິການແມ່ນ້ຳຂອງສາກົນ ຄັ້ງທີ 16 ໄດ້ຖຶກຈັດຂຶ້ນທີ່ ເມຶອງຫົວຫີນ, ປະເທດໄທ ລະຫວ່າງວັນທີ 26–27 ພະຈິກ 2009 ໂດຍການເປັນ ປະທານຂອງ ທ່ານ ສຸວິດ ຄຸນກິຕິ, ລັດຖະມົນຕີວ່າການ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ປະທານຄະນະກຳມະການແມ່ນ້ຳຂອງແຫ່ງຊາດໄທ ທັງເປັນປະທານ ສະພາມົນຕີຄະນະກຳມາທິການແມ່ນ້ຳຂອງສາກົນ ສົກປີ 2009-2010, ກອງປະຊຸມດັ່ງກ່າວແມ່ນມີ ຄະນະຜູ້ແທນຈາກ 4 ປະເທດສະມາຊິກ ຄະນະກຳມາທິການແມ່ນ້ຳຂອງສາກົນເຂົ້າຮ່ວມ (ກຳປູເຈຽ, ສປປ ລາວ, ໄທ, ແລະ ຫວຽດນາມ), ສຳຫຼັບ ຄະນະຜູ້ແທນ ສປປ ລາວ ແມ່ນນຳໂດຍ ທ່ານ ນາງ ເຂັມແພງ ພົນເສນາ,ລັດຖະມົນຕີປະຈຳສຳນັກງານນາຍົກລັດຖະມົນຕີ, ຫົວຫນ້າອົງການຊັບພະຍາກອນນ້ຳແລະສິ່ງແວດລ້ອມ, ປະທານ ຄະນະກຳມະການແມ່ນ້ຳຂອງແຫ່ງຊາດລາວ ທັງເປັນສະມາຊິກສະພາມົນຕີ ຄະນະກຳມາທິການແມ່ນ້ຳຂອງສາກົນ ຂອງ ສປປ ລາວ.
ສະພາມົນຕີ ຄະນະກຳມາທິການແມ່ນ້ຳຂອງສາກົນ ແມ່ນມີບົດບາດ ໃນການຕັດສິນໃນລະດັບນະໂຍບາຍ ແລະ ໃຫ້ທິດຊີ້ນຳໃນການສົ່ງເສີມ, ສະຫນັບສະຫນຸນ, ຮ່ວມມື, ປະສານງານ ກິດຈະກຳແລະແຜນງານຮ່ວມກັນ ເພື່ອຈັດຕັ້ງປະຕິບັດ ສັນຍາ ປີ 1995 ວ່າດ້ວຍການຮ່ວມມືເພື່ືອການພັດທະນາແບບຢືນຍົງ ໃນອ່າງແມ່ນ້ຳຂອງ ແລະການຄຸ້ມຄອງ ຄະນະກຳມາທິການແມ່ນ້ຳຂອງສາກົນ. ສັນຍາແມ່ນ້ຳຂອງທີ່ເຊັນໃນ ປີ 1995 ລະຫວ່າງ ລັດຖະບານ ກຳປູເຈຽ, ສປປ ລາວ , ໄທ, ແລະ ສສ ຫວຽດນາມ ແມ່ນ ເກິດຂຶ້ນຈາກທັດສະນະຮ່ວມກັນຂອງທັງ ສີ່ປະເທດ ໃນການຄຸ້ມຄອງຈັດການຊັບພະຍາກອນນ້ຳແລະພັດທະນາທ່າແຮງທາງເສດຖະກິດໃນຂົງເຂດແມ່ນ້ຳຂອງ.
ກອງປະຊຸມ ດັ່ງກ່າວໄດ້ ແບ່ງອອກ ເປັນ 3 ວັນ ດັ່ງລາຍລະອຽດຕໍ່ໄປນີ້:
- ກອງປະຊຸມສະພາມົນຕີ ເຊິ່ງເປັນກອງປະຊຸມພາຍໃນສະເພາະ ຄະນະຜູ້ແທນຈາກ ບັນດາປະເທດພາຄີ, ໃນວັນທີ 26 ພະຈິກ 2009.
- ກອງປະຊຸມຮ່ວມກັບກຸ່ມຜູ້ໃຫ້ທຶນ ແລະ ປະເທດຄູ່ເຈລະຈາ, ໃນວັນທີ 27 ພະຈິກ 2009.
- ການຮັບຮອງເອົາບົດບັນທຶກກອງປະຊຸມ, ໃນວັນທີ 27 ພະຈິກ 2009.
ໃນບົດປາໃສ ທ່ານ ນາງ ເຂັມແພງ ພົນເສນາ, ໃນນາມປະທານສະພາມົນຕີ ສົກປີ 2008/2009, ໄດ້ກ່າວເຖິງຜົນສຳເລັດ ຂອງ ຄະນະກຳມາທິການແມ່ນ້ຳຂອງສາກົນ ໃນໄລຍະໜຶ່ງປີຜ່ານມາ, ເປັນຕົ້ນວ່າການສະໜອງຕອບ ຢ່າງທັນການ ຕໍ່ ໄພນ້ຳຖ້ວມ ໃນປີ 2008, ການລິເລີ່ມ ປັບຕົວ ຕໍ່ ການປ່ຽນແປງດິນຟ້າອາກາດ, ການເພີ່ມທະວີ ການຮ່ວມມືທາງດ້ານວິຊາການ ກັບ ສປ ຈີນ ໃນການ ປະເມີນຜົນສິ່ງແວດລ້ອມແບບຍຸດທະສາດ ໃນບັນດາເຂື່ອນໄຟຟ້າ ຕາມລຳແມ່ນ້ຳຂອງ, ການສ້າງຂະບວນການມີສ່ວນ ຮ່ວມ ຂອງ ພາກສ່ວນກ່ຽວຂ້ອງ ໃນຂະບວນການຕັດສິນບັນຫາ ໂດຍສະເພາະ ແມ່ນການຮ່າງນະໂຍບາຍການມີ ສ່ວນຮ່ວມຂອງພາກສ່ວນທີ່ກ່ຽວຂ້ອງ, ແລະ ອີກຜົນສຳເລັດໜຶ່ງ ກໍຄືການອະນຸມັດ ຍຸດທະສາດການຊື່ສານ ແລະ ນະໂຍບາຍການເປີດເຜີຍຂໍ້ມູນ ເຊິ່ງຈະມີບົດບາດສຳຄັນ ໃນການເຮັດໃຫ້ ຄະນະກຳມາທິການແມ່ນ້ຳຂອງສາກົນ ເປັນ ອົງການຈັດຕັ້ງທີ່ເປີດເຜີຍ ແລະ ມີຄວາມໂປ່ງໃສຍິ່ງຂຶ້ນ.ກອງປະຊຸມຄັ້ງນີ້ ຍັງໄດ້ຮັບຮອງເອົາ ວິທີການ ແລະ ກອບເວລາ ໃນການສ້າງແຜນຍຸດທະສາດ ປີ 2011-2015. ແຜນຍຸດທະສາດຄັ້ງນີ້ ຈະສ້າງຂື້ນ ໂດຍ ການເປັນເຈົ້າການ ຂອງ ບັນດາປະເທດພາຄີ ໂດຍຈະມີການປະສົມປະສານ ລະຫວ່າງ ບົດຮຽນທີ່ຖອດຖອນໄດ້ ໃນ ການຈັດຕັ້ງປະຕິບັດແຜນຍຸດທະສາດຜ່ານມາ ແລະ ການທົບທວນເຄີ່ງພາກ ຂອງແຜນຍຸດທະສາດ 2006-2010, ການປຶກສາຫາລືໃນວົງກ້ວາງ ກັບ ພາກສ່ວນກ່ຽວຂ້ອງຕ່າງໆ, ແລະ ລະບົບການຄຸ້ມຄອງຜົນງານ ຂອງ ຄະນະກຳມາທິການແມ່ນ້ຳຂອງສາກົນ. ໃນກອງປະຊຸມ ສະພາມົນຕີ ຄັ້ງທີ 16 ນີ້, ກອງປະຊຸມ ໄດ້ ອະນຸມັດ ງົບປະມານບໍລິຫານ ກອງເລຂາ ຄະນະກຳມາທິການແມ່ນ້ຳຂອງສາກົນແລະ ແຜນງານ ສົກປີ 2009/2010, ກອງປະຊຸມຍັງໄດ້ອະນຸມັດຮັບເອົາໂຄງການຄຸ້ມຄອງຊັບພະຍາກອນນ້ຳແບບປະສົມປະສານໃນຂົງເຂດແມ່ນ້ຳຂອງ ຊຶ່ງຈະຊ່ວຍສ້າງກອບສຳຫຼັບພາກພຶ້ນ ໃນການວາງແຜນ ແລະ ຄຸ້ມຄອງຊັບພະຍາກອນນ້ຳແບບປະສົມປປະສານ, ສ້າງເຄືອງມືຄຸ້ມຄອງ, ລະບຽບການ, ຂະບວນການແລະການສ້າງຄວາມອາດສາມາດ ເພື່ອຈັດຕັ້ງປະຕິບັດ ສັນຍາແມ່ນ້ຳຂອງປີ 1995. ພິເສດ, ກອງປະຊຸມຄັ້ງດັ່ງກ່າວນີ້ຍັງສາມາດບັນລຸຂໍ້ຕົກລົງກັນໄດ້ ກ່ຽວກັບບັນຫາທີ່ຕັ້ງຖາວອນ ຂອງສຳນັກງານ ກອງເລຂາ ຄະນະກຳມາທິການແມ່ນ້ຳຂອງສາກົນ; ແທນທີ່ຈະຕ້ອງຫມູນວຽນທີ່ຕັ້ງລະຫວ່າງ ວຽງຈັນ ແລະ ພະນົມເປັນ ທຸກໆ 5 ປີ, ສຳນັກງານກອງເລຂາ ຄະນະກຳມາທິການແມ່ນ້ຳຂອງສາກົນ ຈະໄດ້ມີ 2 ທີ່ຕັ້ງຮ່ວມແບບຖາວອນ ຢູ່ ນະຄອນຫຼວງວຽງຈັນ ຂອງ ສປປ ລາວ ແລະ ນະຄອນຫຼວງພະນົມເປັນ ຂອງ ກຳປູເຈຽ
ພາຍໃນເດຶອນ ມິຖຸນາ 2009, ຈຳນວນພະແນກ ແລະ ແຜນງານ ຈະໄດ້ມີການແຈກຍາຍ ໄປໄວ້ໃນ 2 ທີ່ຕັ້ງ ບົນພຶ້ນຖານຄວາມສະເຫມີພາກ ແລະ ຄວາມເຫມາະສົມ ທາງດ້ານພູມສາດ, ໃນຂະນະທີ່ບັນດາຫ້ອງການບໍລິຫານ ແລະ ປະສານງານ ແລະ ຫນ່ວຍງານຄຸ້ມຄອງ ຈະຕັ້ງຢູ່ ນະຄອນຫຼວງວຽງຈັນແບບຖາວອນ.
ຜົນຂອງກອງປະຊຸມສະພາມົນຕີ ຄະນະກຳມາທິການແມ່ນ້ຳຂອງສາກົນ ຄັ້ງທີ 16 ນີ້ແມ່ນຖຶວ່າ ໄດ້ຮັບ ຜົນສຳເລັດເປັນຢ່າງຍິ່ງ, ອັນເປັນການສ່ອງແສງເຖີງ ມິດຕະພາບ ແລະ ຄວາມເປັນເອກະພາບ ຂອງບັນດາປະເທດພາຄີ ທີ່ພ້ອມກັນຍຶດໝັ້ນ ໃນຫລັກການຮ່ວມມື ເພື່ອການພັດທະນາແບບຍືນຍົງ ໃນອ່າງແມ່ນ້ຳຂອງຕອນລຸ່ມ; ຊື່ງໄດ້ຮັບການຊົມເຊີຍຈາກສາກົນ.
|
