|
(GMS) ໃນລະຫວ່າງ ວັນທີ 8–12 ພະຈິກ 2010 ກອງປະຊຸມພາຄີຕໍ່ອະນຸສັນຍາ ມົງເຣອານຄັ້ງທີ 22 ໄດ້ຈັດຂື້ນທີ່ບາງກອກ,ປະເທດໄທ ໂດຍການເຂົ້າຮ່ວມ ຂອງບັນດາລັດຖະມົນຕີ, ຮອງລັດຖະມົນຕີ, ພະນັກງານຂັ້ນກົມ ແລະ ອາວຸໂສຂອງບັນດາປະເທດພາຄີ ຕໍ່ອະນຸສັນຍາ ມົງເຣອານ.
ນອກນັ້ນຍັງມີບັນດາຜູ້ຕາງໜ້າຈາກອົງການຈັດຕັ້ງສາກົນທີ່ກ່ຽວ ຂ້ອງ, ອົງການ NGOs, ກອງເລຂາໂອໂຊນ, ກອງທຶນຫລາຍຝ່າຍ, ພາກສວ່ນອຸດສະຫະກຳ ແລະ ກະສິກຳ, ສະຖາບັນ ມະຫາວິທະຍາໄລ, ບັນດາຊ່ຽວຊານ ດ້ານເຕັກໂນໂລຊີ ເສດຖະກິດ ແລະ ວິທະຍາສາດ ກໍ່ໄດ້ເຂົ້າຮ່ວມ ເຊິ່ງລວມທັງໝົດມີ 400 ກວ່າຄົນ.
ກອງປະຊຸມຄັ້ງນີ້ໄດ້ຮັບຮອງເອົາ 16 ຂໍ້ຕົກລົງ, ໃນນັ້ນຂໍ້ຕົກລົງເດັ່ນລວມມີ:
(ກ) ດ້ານ ງົບປະມານ ໂດຍ ອະນຸມັດ ງົບປະມານດັດແກ້ສຳລັບປີ 2010 ໃນຈຳນວນ 4, 955,743 US$; ສຳລັບປີ 2011 ໃນຈຳນວນ 4,756,640 US$ ແລະ ຮັບຊາບກ່ຽວກັບ ການສະເໜີງົບປະມານ ສໍາລັບປີ 2012 ໃນຈຳນວນ 4, 943,796 US$; (
ຂ) ຂອບເຂດຄວາມຮັບຜິດຊອບ ຂອງຄະນະກໍາມະການປະເມີນ ກົນໄກການເງີນ ໂດຍໃຫ້ສ້າງຕັ້ງຄະນະກຳມະການຊ່ຽວຊານດັ່ງ ກ່າວທີ່ປະກອບມີ 4 ຄົນ ຈາກປະເທດພັດທະນາ ແລະ ອີກ 4 ຄົນ ຈາກປະເທດກຳລັງພັດທະນາ ເພື່ອນຳສະ ເໜີຕໍ່ກອງປະຊຸມພາຄີ ຄັ້ງທີ 24 ພິຈາລະນາ; ແລະ
(ຄ) ມອບໃຫ້ຄະນະຊ່ຽວຊານ ປະເມີນດ້ານເຕັກໂນໂລຊີ ແລະ ເສດຖະກິດ ສຶກສາ ຕີລາຄາ ກ່ຽວກັບ ວິທີການທຳລາຍສານເຄມີທີ່ທຳລາຍຊັ້ນໂອໂຊນ (ODS) ເປັນຕົ້ນ ສານເມທີນໂບຣມາຍ, ທົບທວນຄືນລາຍການບັນຊີເຕັກໂນໂລຊີ ທີ່ຮັບຮອງໃນກອງປະຊຸມພາຄີຄັ້ງທີ 15 (MOP-15) ເພື່ອທຳລາຍສານ ODS ພ້ອມທັງພັດທະນາມາດຖານ ສໍາລັບກວດສອບ.
ເຖິງແມ່ນວ່າຮ່າງຂໍ້ຕົກລົງ ເພື່ອດັດແກ້ອະນຸສັນຍາ ມົງເຣອານ ທີ່ລວມມີສານເຄມີ Hydrofluorocarbons (HFCs) ປະເພດທົດແທນບໍ່ໄດ້ຖືກຮັບຮອງໃນຄັ້ງນີ້, ແຕ່ບັນດາປະເທດພາຄີ ກໍ່ໄດ້ຕັດສິນໃຈສືບຕໍ່ຖືເປັນພັນທະພາຍໃຕ້ ອະນຸສັນຍາ ມົງເຣອານ ໃນອານາຄົດ.
ສຳລັບຄະນະຜູ້ແທນລາວເຊິ່ງນຳໂດຍ ທ່ານ ນາງ ເຂັມແພງ ພົນເສນາ ລັດຖະມົນຕີປະຈຳ ສຳນັກງານນາຍົກລັດຖະມົນຕີ, ຫົວໜ້າ ອົງການຊັບພະຍາກອນນ້ຳ ແລະ ສິ່ງແວດລ້ອມໄດ້ເຂົ້າຮ່ວມກອງປະຊຸມເຈົ້າໜ້າທີ່ລະດັບສູງ ຈັດຂື້້ນໃນວັນທີ 11-12 ພະຈິກ 2010 ພ້ອມດຽວກັນ ກໍ່ໄດ້ກ່າວຄຳເຫັນ ໂດຍໄດ້ຢ້ຳຄືນເຖິງບາງທັດສະນະສຳຄັນຄື: ຍຶດໝັ້ນການປະຕິບັດພັນທະ ຂອງສປປລາວ ໃນນາມເປັນປະເທດພາຄີ ໂດຍໃຫ້ສຳເລັດ ການຈັດຕັ້ງປະຕິບັດ ແຜນຄຸ້ມຄອງການຫລຸດຜ່ອນ ແລະ ເຊົາໃຊ້ສານເຄມີທີ່ທຳລາຍຊັ້ນໂອໂຊນ ໄລຍະສຸດທ້າຍໃນປີ 2010. ນອກນັ້ນ, ທ່ານຍັງໄດ້ຍົກໃຫ້ເຫັນວຽກງານສຳຄັນ ທີ່ສປປ ລາວໄດ້ດຳເນີນຜ່ານມາ, ກຳລັງດຳເນີນການຢູ່ ແລະ ແຜນການຕໍ່ໜ້າ ເປັນຕົ້ນການສ້າງແຜນງານແຫ່ງຊາດ ວ່າດ້ວຍ ການຄຸ້ມຄອງການນຳໃຊ້ ສານເຄມີທີ່ທຳລາຍຊັ້ນໂອໂຊນປະເພດທົດແທນ ຄືສານ Hydrochlorofluorocarbons (HCFCs) ໃຫ້ສໍາເລັດເພື່ອນໍາສະເໜີຕໍ່ກອງປະຊຸມ ຄະນະກຳມະການບໍລິຫານງານ ອະນຸສັນຍາມົງເຣອານ ທີ່ຈະຈັດຂື້ນໃນຕົ້ນປີ 2011 ພິຈາລະນາອະນຸມັດ.
|
