(ຂປລ): ຍ້ອນວ່າໃນອາທິດຜ່ານມາ ແຂວງວຽງຈັນ ໄດ້ຮັບພາຍຸລົມມໍລະສຸມພັດຜ່ານ ເຮັດໃຫ້ມີຝົນຕົກໜັກຫລາຍວັນຕິດຕໍ່ກັນ, ເຮັດໃຫ້ປະລິມານນ້ຳຕາມ ສາຂາຕ່າງໆ ໄຫລລົງໃສ່ແມ່ນ້ຳງື່ມ ເພີ່ມຂຶ້ນເປັນຈຳນວນຫລວງຫລາຍ, ສະນັ້ນ ທາງເຂື່ອນໄຟຟ້ານ້ຳງື່ມ ຈຶ່ງໄດ້ທຳການປ່ອຍນ້ຳ ອອກຈາກອ່າງກັກເກັບນ້ຳ ໃນ ລະດັບ 2,40 ແມັດ, ຍົກຂຶ້ນຈາກປະຕູນ້ຳ, ປະຈຸບັນ ປະລິມານນ້ຳທີ່ໄຫລຜ່ານປະຕູນ້ຳລົ້ນ 986,5 ແມັດກ້ອນ/ວິນາທີ ແລະ ໄຫລຜ່ານກົງຫັນ 446 ແມັດ ກ້ອນ/ວິນາທີ, ສະນັ້ນ ປະລິມານນ້ຳທີ່ປ່ອຍອອກແມ່ນ 1.430 ແມັດ ກ້ອນ/ວິນາທີ, ນ້ຳໄຫລເຂົ້າອ່າງ 2.043 ແມັດກ້ອນ/ວິນາທີ, ປະລິມານນ້ຳຝົນທີ່ແທກ ໄດ້ໃນວັນທີ 20/8/2011 ແມ່ນ 433 mm ຊຶ່ງຄວາມສາມາດກັກເກັບນ້ຳ ຂອງເຂື່ອນແມ່ນຢູ່ໃນລະດັບ 7.030 ລ້ານແມັດກ້ອນ, ປະຈຸບັນ ປະລິມານນ້ຳແມ່ນ 7.150 ລ້ານແມັດກ້ອນ ຊຶ່ງປະກົດການດັ່ງກ່າວ ບໍ່ເຄີຍມີມາກ່ອນແຕ່ປີ 1.972 ເປັນຕົ້ນມາ ຊຶ່ງປ່ອນນ້ຳອອກຈາກອ່າງດັ່ງກ່າວ ແມ່ນໄດ້ເລີ່ມມາແຕ່ວັນ ທີ 17 ສິງຫາ ເປັນຕົ້ນມາ.

(ຂປລ): ກົມອຸຕຸນິຍົມ ແລະ ອຸທົກກະສາດ ລາຍງານວ່າ: ໃນໄລຍະທີ 3-5/8/2011 ໄດ້ມີຝົນຟ້າຄະ ນອງ ໃນລະດັບຄ່ອຍ ຫາປານກາງ ເປັນສ່ວນ ຫລາຍ ແລະ ຕົກໜັກຢູ່ບາງທ້ອງຖິ່ນເຂດພາກກາງ ໂດຍສະເພາະ ແຂວງບໍລິຄຳໄຊ ແລະ ແຂວງຄຳມ່ວນ. ແນວໃດກໍຕາມໃນໄລຍະແຕ່ວັນທີ 6-9/8/2011 ສະພາບ ຝົນຕົກຟ້າຄະນອງ ຍັງຈະມີທ່າອ່ຽງເພີ່ມຂຶ້ນ ແລະ ຈະມີຝົນຕົກໃນລະດັບປານກາງຫາຕົກໜັກ ຢູ່ບາງທ້ອງຖິ່ນໃນແຕ່ລະພາກ ຊຶ່ງອາດຈະສົ່ງຜົນ ໃຫ້ເກີດໄພ ນ້ຳຖ້ວມ, ດິນຖະຫລົ່ມ ຈຶ່ງແຈ້ງເຕືອນໃຫ້ປະຊາຊົນ ມີສະຕິລະວັງຕົວ.

ພິທີ​ມອບ-​ຮັບ​ໜ້າ​ທີ່ ລະຫວ່າງ ທ່ານ ຄຳ​ອ້ວນ​ ບຸບຜາ, ລັດຖະມົນຕີ​ປະຈຳ​ສຳນັກງານ​ນາ ຍົກລັດຖະມົນຕີ, ຫົວໜ້າ​ອົງການ​ຄຸ້ມ​ຄອງ​ທີ່​ດິນ​ແຫ່ງ​ຊາດ ​ແລະ ທ່ານ ນູລິນ ສິນ​ບັນດິດ, ລັດຖະມົນຕີ​ວ່າການ​ກະຊວງ​ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ​ໄດ້​ຈັດ​ຂຶ້ນ​ໃນວັນ​ທີ 29 ກໍລະກົດ 2011 ທີ່ຫ້ອງວ່າ ການລັດຖະບານ ​ໂດຍ​ການ​ໃຫ້​ກຽດ​ເຂົ້າຮ່ວມ​ຂອງ ທ່ານ ອາຊາ​ງ ລາວ​ລີ, ກຳມະການ​ກົມ​ການ​ເມືອງ​ສູນ​ກາງ​ພັກ, ຮອງ​ນາຍົກລັດຖະມົນຕີ ທັງເປັນປະທານ ຄະນະປັບປຸງກົງຈັກລັດຖະບານ ມີ​ບັນດາ​ພະນັກງານ​ຂັ້ນສູງ​ທີ່​ກ່ຽວຂ້ອງ ເຂົ້າຮ່ວມ​ເປັນ​ສັກຂີ​ພິຍານ.

​ໃນ​ພິທີ​ທີ່​ມີ​ຄວາມ​ໝາຍ​ສຳຄັນ​ນີ້ ທ່ານ ຄຳ​ອ້ວນ ບຸບຜາ ​ໄດ້​ຂຶ້ນລາຍ​ງານ​ການຈັດຕັ້ງປະຕິບັດ​ວຽກ​ງານ​ຂອງ​ອົງການ​ຄຸ້ມ​ຄອງ​ທີ່​ດິນ​ ແຫ່ງ​ຊາດ​ ຕະຫລອດ​ໄລ ຍະ​ຜ່ານ​ມາ ອັນ​ພົ້ນ​ເດັ່ນ​ແມ່ນ​ວຽກ​ງານ​ເກັບ​ກຳ​ຂໍ້​ມູນ​ຈາກ​ທີ່​ດິນ, ການ​ສຳ​ຫລວດ​ຈັດ​ສັນ​ທີ່​ດິນ, ການ​ອອກ​ໃບ​ຕາດິນ, ການ​ກວດກາ​ການ​ນຳ​ໃຊ້​ທີ່​ດິນ, ວຽກ​ງານ ​ຄຸ້ມ​ຄອງ-ບໍລິຫານ​ທີ່​ດິນ ​ແລະ ອື່ນໆ. ສິ່ງ​ສຳຄັນ​ແມ່ນ​ການ​ຜັນ​ຂະຫຍາຍ​ທິດ​ນຳ, ນະ​ໂຍບາຍ​ຂອງ​ພັກ-ລັດຖະບານ​ໃນ​ການ​ຄຸ້ມ​ຄອງ​ທີ່​ດິນ, ການ​ປົກ​ປັກ​ຮັກສາ ​ແລະ ນຳ​ໃຊ້​ທີ່​ດິນ​ໃຫ້​ເກີດ​ຜົນ​ປະ​ໂຫຍ​ດສູງ​ສຸດ, ຮັບປະກັນ​ບໍ່​ໃຫ້​ເກີດ​ຜົນ​ກະທົບ​ດ້ານ​ສິ່ງ​ແວດ​ລ້ອມ ​ແລະ ສັງຄົມ.

(​ໂດຍ​ປະ​ຕິ​ບັດ ຕາມ​ມະຕິ​ຄຳ​ສັ່ງ​ ຂອງ​ກອງ​ປະ​ຊຸ​ມຄັ້ງ​ປະຖົມມະ​ເລີກ​ຂອງ​ສະພາ​ແຫ່ງ​ຊາດ​ຊຸດ​ທີ VII ວ່າ​ດ້ວຍ​ການ​ຮັບຮອງ​ເອົາ​ໂຄງ​ປະກອບ​ກົງຈັກ​ລັດຖະບານ​ສະ​​ໄຫມທີ VII ​ແລະ ອິງ​ຕາມ​ ລັດຖະດຳ ລັດຂອງ​ປະທານ​ປະ​ເທດ ສ ປ ປ ລາວ ວ່າ​ດ້ວຍ​ການ​ແຕ່ງ​ຕັ້ງ​ພະນັກງານ​ການ​ນຳ​ຂັ້ນ​ສູງ​ຮັບ​ໜ້າ​ທີ່​ໃຫມ່) ອົງການ​ ຊັບພະຍາກອນ​ນ້ຳ ​ແລະ ສິ່ງ​ແວດ​ລ້ອມ​ ໄດ້​ຈັດ​ພິທິຮັບ​ໜ້າ​ທີ ລະຫວ່າງ ທ່ານ​ ນ.​ເຂັມ​ແພງ ພົນ​ເສນາ, ລັດຖະມົນ​ຕີ​ ປະຈຳ​ສຳນັກງານ​ນາ​ຍົກ, ຫົວໜ້າ ອົງການ ​ຊັບພະຍາກອນ​ນ້ຳ ​ແລະ ສິ່ງ​ແວດ​ລ້ອມ ​ແລະ ທ່ານ ນູລິນ ສິນບັນດິດ, ລັດຖະມົນຕີ​ວ່າການ​ ກະຊວງ​ ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ພາຍ​ໃນວັນ​ທີ 15 ກໍລະກົດ 2011 ​ໂດຍ​ເປັນ​ກຽດ​ເຂົ້າ​ຮ່ວມ​ຂອງ​  ທ່ານ ທອງ​ສິງ ທຳ​ມະ​ວົງ,  ກຳມະການກົມ​ການ​ເມືອງ​ສູນກາງ​ພັກ, ​ນາຍົກ​ລັດຖະມົນຕີ, ນອກ​ນັ້ນຍັງ​ມີ ລັດຖະມົນຕີ​ວ່າການ, ລັດຖະມົນຕີ​ຊ່ວຍ​, ຜູ້ຕາງໜ້າ​ຈາກ​ຄະນະ​ຈັດ​ຕັ້ງ​ສູນ​ກາງ​ພັກ, ຫ້ອງ​ວ່າການ​ລັດຖະບານ ​ແລະ ບັນດາ​ພະນັກງານ​ການ​ນຳ​ຫຼັກ​ແຫຼ່ງ​ ຈາກ ອົງການ​ ຊັບພະຍາກອນ​ນ້ຳ ​ແລະ ສິ່ງ​ແວດ​ລ້ອມ.